Respublikamizda Xalq ijodiyotining
turli yo’nalishlari va badiiy havaskorlik san’atini yanada rivojlantirish,
xali nomlari ko’pchilikka tanish bo’lmagan yangi iqtidorlarni kashf
etish maqsadida, har yili bir nechta ko’rik tanlovlar, festivallar
va madaniy-ommaviy bayramlarni tashkil etiladi va o’tkaziladi.
Ayni paytda Respublikamizda 14 mingdan ortiq badiiy havaskorlik
jamoalari bo’lib, ulardan 317 tasi “Xalq havaskorlik jamoasi” va
“Namunali” unvonga ega. Mazkur badiiy havaskorlik jamoalarida uch
yuz mingga yaqin turli kasb egalari bo’lgan ikkinchi iste’dod sohiblari
qatnashmoqdalar.
1991 yilgacha xalq ijodiyotining yo’nalishlaridan ashula va raqs
ansambllari, vokal-cholg’u ansambllari, xor jamoalarining ko’rik-tanlovlari
hamda xalq xunarmandlarining ko’rgazmalarigina o’tkazib kelingan
bo’lsa, Mustaqillik davrida bu tanlovlar va festivallarning yangicha
shakllari kashf etilib, markaz tomonidan o’tkaziladigan festivallar
xalqaro miqiyosga ko’tariladi. Bunga yorqin misol qilib, YUNESKO
xalqaro tashkilotining O’zbekistondagi vakolatxonasi bilan hamkorlikda
har ikki yilda bir marta Surxondaryo viloyatining Termiz shahrida
o’tkaziladigan Markaziy Osiyo Respublikalari baxshi-shoirlar va
oqinlari ishtirokidagi Xalqaro ko’rik-festivalni keltirish mumkin.
- Folklor-etnografik jamoalarining Respublika
ko’rik-tanlovi;
- “Alla” ijrochilarining an’anaviy Respublika
ko’rik-tanlovi;
- Milliy dorbozlar, an’anaviy sirk san’ati va
havaskor qo’g’irchoq teatrlarining
Respublika ko’rik-festivali;
- To’y-marosim qo’shiqlari ijrochilarining Respublika
ko’rik-tanlovi;
- Ashula va raqs ansambllari hamda lapar ijrochilarining
Respublika ko’rik-tanlovi;
- Askiyachi va qiziqchilarning an’anaviy Respublika
ko’rik-tanlovi;
- Havaskorlik xalq teatrlarining Respublika ko’rik-tanlovi;
- Maqom ansambllari va katta ashula ijrochilarining
an’anaviy Respublika ko’rik-tanlovi;
- “Barxayot siymolar” turkumidan O’zbekiston bastakorlari
asarlari ijrochilarning Respublika ko’rik-tanlovi;
- “O’lan aytgali keldik” deb nomlangan folklor
san’ati bayrami kabilar shular jumlasidandir.
Xalq ijodiyoti soxalarini rivojlantirish va uni keng targ’ib etish
ishlarini nafaqat Respublikamizda, shuningdek, milliy folklor-etnografik
hamda raqs san’atini horij davlatlarida ham keng targ’ib etishda
badiiy havaskorlik jamoalari ham faol ishtirok etishmoqda.
|
